اسلام آباد: وزیر داخلہ محسن نقوی کی صدارت میں ہونے والے اجلاس میں زائدالمیعاد شناختی کارڈز پر جاری تمام سمز فوری طور پر بلاک کرنے کا فیصلہ کیا گیاہے۔
یہ اقدام شہریوں کے کوائف کے درست اندراج اور سکیورٹی معاملات کو یقینی بنانے کے لیے کیا گیا ہے، اجلاس میں فیصلہ کیا گیا کہ پہلے مرحلے میں 2017 یا اس سے پہلے کے شناختی کارڈز پرجاری سمز بند کی جائیں گی۔
وفاقی وزیر داخلہ نے ملک بھرمیں چہرہ شناسی تکنیک کا نفاذ بھی 31 دسمبر 2025 تک یقینی بنانے کی ہدایات دیں، اجلاس میں ملتان، سکھر اور گوادر میں نادرا کے ریجنل دفاتر کے قیام کی منظوری بھی دی گئی۔
اس اجلاس کے بعد محسن نقوی اور طلال چوہدری نے سیکٹر آئی ایٹ میں 10 منزلہ نادرا میگا سینٹر کا سنگ بنیاد بھی رکھا۔ اس جدید ترین میگا سینٹر میں شہریوں کو شناختی کارڈ، بائیومیٹرک تصدیق اور دیگر نادرا سہولیات ایک ہی چھت تلے میسر ہوں گی۔
