بھارت کے سابق کپتان ویرات کوہلی کو آسٹریلوی اخبار نے ”مسخرہ کوہلی“ لکھ دیا۔
آسٹریلوی اخبار کی جانب سے ویرات کوہلی کی تصویر شائع کرتے ہوئے انہیں مسخرہ بنا کر پیش کیا گیا، جس سے بھارتی میڈیا بھی آگ بگولہ ہو گیا۔
اخبار نے سرخی میں سابق بھارتی کپتان کوہلی کی تصویر چھاپی جس پر کلاؤن کوہلی لکھا تھا۔ یاد رہے کہ باکسنگ ڈے ٹیسٹ کے پہلے دن بھارتی بیٹر ویرات نے سیم کونسٹاس کو کندھا مارا تھا۔
اس معاملے پر بھارتی میڈیا کا کہنا ہے کہ پوسٹ ڈے پریسر میں کھیل کے بعد کونسٹاس نے صرف اتنا کہا کہ ویرات غلطی سے ان سے ٹکرائے تھے۔ کونسٹاس کا کہنا تھا کہ میں اپنے دستانے ایڈجسٹ کر رہا تھا اور مجھے لگتا ہے کہ کوہلی نے غلطی سے مجھے ٹکر مار دی۔
واضح رہے کہ بھارتی ٹیم کے سابق کپتان ویرات کو آسٹریلوی اوپنر سیم کونسٹاس کے ساتھ الجھنا مہنگا پڑا جس کے بعد آئی سی سی نے ویرات کوہلی کو میچ فیس کا 20 فیصد جرمانہ عائد کرتے ہوئے ایک ڈی میرٹ پوائنٹ بھی دے دیا۔
