امریکا اور اومان کے میچ میں ون ڈے کرکٹ کے دو نئے ریکارڈ بن گئے۔
امریکا نے ون ڈے انٹرنیشنل میں بھارت کے کم اسکور کے دفاع کا ریکارڈ توڑ دیا، 123 رنز کے ہدف کے دفاع میں امریکا نے اومان کو 65 رنز پر آؤٹ کردیا، دوسرا ون ڈے کرکٹ کی تاریخ میں پہلی بار ایک میچ میں تمام اوورز اسپنرز سے کروائے گئے۔
واضح رہے کہ العامرات میں کھیلے گئے آئی سی سی مینز کرکٹ ورلڈ کپ لیگ 2 کے میچ میں اومان نے ٹاس جیت کر امریکا کو پہلے بیٹنگ کی دعوت دی اور مہمان ٹیم کو 122 رنز ہی بنانے دیے۔
امریکا کی طرف سے ملنگ کمار 47 رنز بنا کر ناٹ آؤٹ رہے۔اومان کی جانب سے صرف اسپنرز سے باؤلنگ کروائی گئی، شکیل احمد نے 3، عامر کلیم اور سمے شریواستو نے دو دو جبکہ جے اوڈیدرا اور سدھارتھ بُکاپٹنم نے ایک ایک کھلاڑی کو آؤٹ کیا۔
اس کے جواب میں امریکا نے بھی اسپنرز سیباؤلنگ کروائی اور اومان کی پوری ٹیم کو 65 رنز پر آؤٹ کر دیا۔ اومان کی جانب سے حماد مرزا 29 رنز بنا کر نمایاں رہے۔
