سابق وفاقی وزیر فواد چودھری نے ہم نیوزکے پروگرام صبح سے آگے میں کہا ہے کہ سلمان اکرم، بیرسٹر گوہر اوررؤف حسن کو بیرون ملک جانے کی سہولت ہے۔
سابق وفاقی وزیر نے کہا کہ پی ٹی آئی میں موجود لوگ کہتے ہیں میں تحریک انصاف کا حصہ نہیں، میں 48 مقدمات کا سامنا کر رہا ہوں، نام ای سی ایل میں ہے، ان کا کہنا تھا کہ شیخ وقاص اکرم سمیت دیگر کو ملک سے باہر جانے کی سہولت کیوں میسر ہے؟
انہوں نے کہا کہ پی ٹی آئی کی موجودہ لیڈر شپ پر تو کوئی مقدمہ بھی نہیں، پی ٹی آئی کی پرانی لیڈر شپ کے ساتھ رویہ مختلف کیوں ہے؟ ان کا کہنا تھا کہ ان لوگوں کو پی ٹی آئی کی اصل لیڈر شپ کو مائنس کرنے کیلئے انسٹال کیا گیا۔ سابق وفاقی وزیر نے کہا کہ ہم ریلیز کمیٹی بنا رہے ہیں جو پرانے لوگوں پر مشتمل ہو گی۔
سابق وفاقی وزیرفواد چودھری نے کہا کہ شعیب شاہین کی زبان دیکھیں ان کو پھولوں کے ہار پہنانے سے تو رہا، ذاتی حملوں پر تو بندے کو غصہ آ ہی جاتا ہے،ایسا واقعہ نہیں ہونا چاہیے تھا، اس پر بانی پی ٹی آئی نے کہا تھا کیوں بچوں کی طرح لڑتے رہتے ہیں۔
ان کا کہنا تھا کہ سیاسی کمیٹی کے تین اجلاس ہوئے،میرے خلاف بیان کے علاوہ کچھ نہیں کیا،ان کے پاس بانی پی ٹی آئی کی رہائی کیلئے کوئی حکمت عملی نہیں۔
