پاکستان کی معروف اداکارہ صبا قمر نے بے بنیاد الزامات لگانے پر صحافی نعیم حنیف کے خلاف 10 کروڑ روپے ہرجانے کا قانونی نوٹس جاری کر دیا ہے۔
رپورٹ کے مطابق یہ اقدام اس وقت سامنے آیا جب صحافی نے ایک پوڈکاسٹ کے دوران اداکارہ صبا قمر کے بارے میں بغیر ثبوت اور توہین آمیز الزامات عائد کیے۔
قانونی نوٹس کے مطابق صحافی نے اپنے یوٹیوب پروگرام میں یہ دعویٰ کیا تھا کہ صبا قمر نے لاہور کے والٹن علاقے میں ایک ایسے گھر میں قیام کیا جو مبینہ طور پر ایک نامعلوم شخص نے انہیں فراہم کیا تھا۔ اداکارہ نے ان الزامات کو جھوٹ، بے بنیاد اور کردار کشی کی کوشش قرار دیا۔
صبا قمر نے اپنے انسٹاگرام اکاؤنٹ پر پوڈکاسٹ کا اسکرین شاٹ شیئر کرتے کہا کہ ایسی بے بنیاد باتیں صرف عورتوں کی ساکھ خراب کرنے کے لیے پھیلائی جاتی ہیں۔
اداکارہ کی قانونی ٹیم کی جانب سے جاری کردہ نوٹس میں کہا گیا کہ اگر سات روز کے اندر عوامی معافی نہ مانگی گئی اور متعلقہ مواد ڈیجیٹل پلیٹ فارمز سے حذف نہ کیا گیا، تو عدالت سے رجوع کیا جائے گا۔
