آسٹریلیا میں ایک عوامی لائبریری کو تقریباً ڈیڑھ صدی قبل لی گئی کتاب واپس مل گئی، جس نے لائبریری انتظامیہ سمیت مقامی افراد کو بھی حیران کر دیا۔
غیر ملکی میڈیا رپورٹس کے مطابق آسٹریلیا کے ساحلی شہر کیاما کی عوامی لائبریری میں گزشتہ ہفتے ایک نایاب کتاب واپس جمع کرائی گئی، جو تقریباً 150 برس قبل لائبریری سے جاری کی گئی تھی۔
لائبریری کی منیجر مشیل ہڈسن کے مطابق مقامی شہری روس سیمنز نے اپنے آبائی گھر کی مرمت کے دوران ایک بند آتش دان (فائر پلیس) کے اندر اینٹوں سے بند چائے کی لکڑی کی پیٹی دریافت کی، جس میں یہ تاریخی کتاب موجود تھی۔ طویل عرصے تک بند رہنے اور نمی کے باعث کتاب کو پانی سے نقصان بھی پہنچا۔
کتاب کا عنوان “Antiquities of Athens”ہے، جو 1858 میں شائع ہوئی تھی۔ یہ کتاب 1872 میں قائم ہونے والی کیاما لائبریری کے ابتدائی تقریباً ایک ہزار کتابوں کے ذخیرے میں شامل تھی اور اس پر لائبریری کا نمبر 506 درج ہے۔ لائبریری انتظامیہ کا خیال ہے کہ یہ کتاب لائبریری کے قیام کے چند ہی برس بعد گم ہوگئی تھی۔
روس سیمنز کا کہنا ہے کہ ان کا اندازہ ہے کہ یہ کتاب ان کے پڑدادا جان سیمنز نے مستعار لی ہوگی، کیونکہ اسی دور میں وہ اس مکان میں رہائش پذیر تھے جبکہ ان کے بچے اس وقت بہت کم عمر تھے۔ جان سیمنز انگلینڈ سے آسٹریلیا منتقل ہوئے تھے اور بعد ازاں کیاما کی مقامی بلدیاتی حکومت میں بھی خدمات انجام دیتے رہے۔
