بیرون ممالک میں پاکستان کے تمام اقسام کے چاول کی مانگ میں مزید اضافہ ہو گیا، پاکستان نے 3ماہ میں چاول کی برآمد پر 72 کروڑ 18لاکھ ڈالر کا زرمبادلہ کما لیا۔
دستاویز کے مطابق پہلی سہ ماہی میں چا ول کی برآمدات میں 77.63 فیصد کا بڑا اضافہ ریکارڈ کیا گیا، جولائی سے ستمبر تک 9 لاکھ 91 ہزار میٹرک ٹن چاو ل برآمد کئے گئے، گزشتہ مالی سال پہلی سہ ماہی میں 5لاکھ 96 ہزار ٹن چاول برآمد کئے گئے تھے۔
گزشتہ مالی سال چا ول برآمدات پر 40 کروڑ 64 لاکھ ڈالر کا زرمبادلہ آیا، ستمبر میں چا ول کی برآمدات میں سالانہ 49.19 فیصد کا بھی بڑا اضافہ دیکھا گیا تھا، صرف ایک ماہ کے دوران 3 لاکھ 74 ہزار میٹرک ٹن چاول ایکسپورٹ کیے گئے۔
دستاویز کے مطابق زیرجائزہ عرصے کے دوران 3 لاکھ 74 ہزار میٹرک ٹن چاول کی برآمد پر 25 کروڑ 72 لاکھ ڈالر زرمبادلہ آیا، گزشتہ مالی سال ستمبر میں 2 لاکھ 55 ہزار میٹرک ٹن چاول ایکسپورٹ ہوئے تھے۔
پہلی سہ ماہی کے دوران 2 لاکھ 52 ہزار ٹن باسمتی چاو ل ایکسپورٹ کیے گئے، جولائی تا ستمبر باسمتی چاول کی برآمدات میں 65.78 فیصد کا بڑا اضافہ ریکارڈ کیا گیا۔
