ڈیڑہ ماہ میں عوام سے کتنے ارب روپے کی پٹرولیم لیوی وصول کی گئی؟

حکومت کی جانب سے پیٹرولیم مصنوعات پر عائد لیوی کی وصولی میں غیر معمولی اضافے کا انکشاف ہوا ہے۔

اعداد و شمار کے مطابق گزشتہ ڈیڑھ ماہ کے دوران عوام سے 180 ارب روپے سے زائد رقم اس مد میں حاصل کی گئی۔

رواں مالی سال کے آغاز سے اب تک مجموعی طور پر 1 ہزار 234 ارب روپے پیٹرولیم لیوی کی مد میں جمع کیے جا چکے ہیں۔

یہ وصولی گزشتہ مالی سال کے اسی عرصے کے مقابلے میں تقریباً 400 ارب روپے زیادہ ہے، جسے ملکی تاریخ میں مالیاتی لحاظ سے ایک بڑی پیش رفت قرار دیا جا رہا ہے۔

جولائی میں 157 ارب روپے جمع ہوئے جبکہ اگست میں یہ رقم 103 ارب 46 کروڑ روپے رہی۔ ستمبر کے دوران 112 ارب 85 کروڑ روپے اور اکتوبر میں 143 ارب 48 کروڑ روپے کی وصولی ہوئی۔ نومبر میں یہ رقم 148 ارب 36 کروڑ روپے رہی، جبکہ دسمبر کے مہینے میں سال کی سب سے زیادہ ماہانہ وصولی 162 ارب 46 کروڑ روپے ریکارڈ کی گئی۔

جنوری کے دوران 108 ارب 76 کروڑ روپے، فروری میں 120 ارب 39 کروڑ روپے اور مارچ میں 139 ارب 48 کروڑ روپے اکٹھے کیے گئے۔ اپریل کے ابتدائی 15 دنوں کے دوران اب تک 38 ارب روپے سرکاری خزانے میں جمع ہو چکے ہیں۔