پاکستان کرکٹ ٹیم کے کپتان بابر اعظم اور فاسٹ باؤلر شاہین شاہ آفریدی نے بچپن میں پاک بھارت ٹاکرا دیکھنے کی یادیں شیئر کردیں۔
بھارتی ٹی وی چینل ‘اسٹار اسپورٹس’ کو دیے گئے انٹرویو میں بابر اعظم نے کہا کہ ‘پاک بھارت میں بہت پریشر ہوتا ہے۔ اس مقابلے کو دیکھنے اور کھیلنے میں بہت فرق ہے، پہلے ٹی وی پر دیکھتے تھے اب کھیلتے ہیں تو وہ بالکل مختلف ہے۔
بابر اعظم کا کہنا تھا کاہ پوری دنیا اس مقابلے کا انتظار کرتی ہے، ماضی میں، میں بھی اس مقابلے کا شدت سے انتظار کرتا تھا۔ ہم نے امریکا میں پہلے کبھی نہیں کھیلا لیکن ہماری تیاری بہت اچھی ہے۔
کپتان قومی ٹیم ٹیم نے مزید کہا کہ جب آپ کسی بڑے ایونٹ میں مختلف حالات میں کھیلتے ہیں تو پھر جوش بھی ویسا ہی ہوتا ہے۔
اس موقع پر شاہین آفریدی نے پاک بھارت ٹاکرے سے متعلق کہا کہ وہ بچپن میں اسکول کی چھٹی کرکے پاکستان اور بھارت کا میچ دیکھتے تھے۔ نتیجہ جو بھی ہو، پاک بھارت میچ ضرور دیکھتے تھے۔ اب بھی یہ ایک بڑا میچ ہے، ایک بار پھر ہم مقابلے کے لیے تیار ہیں۔
سابق کپتان نے کہا کہ ورلڈ کپ پہلی بار امریکہ میں ہو رہا ہے، یہ ہمارے لیے بھی نیا ہے۔ ہمارے کچھ ساتھی یہاں کھیل چکے ہیں لیکن ہم یہاں پہلی بار ایک گروپ کے طور پر آئے ہیں، امید ہے ہمارا یہ ایونٹ اچھا رہے گا۔
