گورنر سندھ کامران ٹیسوری نے کہا ہے کہ کراچی میں حالات خراب کرنے کی کوشش کی گئی، پاکستان مضبوط افواجِ پاکستان کے ہاتھوں میں ہے۔
کامران ٹیسوری چہلم امام حسین کے موقع پر نشتر پارک پہنچے جہاں انہوں نے چہلم امام حسین کے مرکزی جلوس کے انتظامات کا جائزہ لیا۔ اس موقع پر انہوں نے کہا کہ چہلم امام حسین کے لیے سیکیورٹی کے بھرپور انتظامات یقینی بنائے گئے ہیں۔
ان کا کہنا تھا کہ گزشتہ روز پیش آنے والے واقعے میں ملوث عناصر کی جَلد نشاندہی کرلی جائے گی۔ مختلف مکاتب فکر کے علمائے کرام کو ادراک ہے گزشتہ روز کا واقعہ ایک سازش ہے۔
انہوں نے کہا کہ اس سازش کا مقصد شہر کے امن و امان کی فضا کو خراب کرنا ہے۔ شہر میں امن و امان کے قیام کے لیے سیکیورٹی اداروں نے اپنی جانیں قربان کیں، سیکیورٹی فورسز کی قربانیاں کسی صورت بھی رائیگاں جانے نہیں دیں گے۔
انہوں نے مزید کہا کہ جب جب پاکستان ترقی کرنا چاہتا ہے تو دشمن قوتیں بلوچستان کے حالات خراب کرتی ہیں۔ دعا کریں کہ بلوچستان سمیت پورے پاکستان کے حالات بہتر ہوں۔
