اسلام آباد: وزیر اعظم شہباز شریف آج جمعرات کو 2 روزہ دورے پر متحدہ عرب امارات روانہ ہوں گے۔
ترجمان دفتر خارجہ کے مطابق وزیر اعظم شہباز شریف کے ہمراہ کابینہ کے اہم وزراء پر مشتمل وفد بھی روانہ ہو گا۔ وزیر اعظم کا اپنے انتخاب کے بعد یہ متحدہ عرب امارات کا پہلا دورہ ہے۔
وزیر اعظم شہباز شریف کی متحدہ عرب امارات کے صدر اور ابوظہبی کے حکمران شیخ محمد بن زاید سے ملاقات متوقع ہے۔ دونوں رہنما تجارت اور سرمایہ کاری پر خصوصی توجہ کے ساتھ دوطرفہ تعلقات پر تبادلہ خیال کریں گے۔
وزیراعظم کی دیگر اماراتی شخصیات اور مالیاتی اداروں کے سربراہان سے بھی ملاقاتیں کریں گے۔
دفتر خارجہ کے مطابق وزیراعظم کا دورہ متحدہ عرب امارات سے تعاون کو مضبوط کرنے کی جانب اہم قدم ہے۔
