اسلام آباد: سپریم کورٹ آف پاکستان نے اپنے ملازمین اور افسران کے لیے یوٹیلیٹی الاؤنس میں 100 فیصد اضافے کی منظوری دے دی ہے۔
چیف جسٹس آف پاکستان کی منظوری کے بعد نئے الاؤنسز کا اطلاق یکم جولائی 2026 سے ہو گا۔ سپریم کورٹ کی جانب سے جاری کردہ فیصلے کے مطابق بڑھتی ہوئی مہنگائی، بجلی اور گیس کے اخراجات میں اضافے کو مدنظر رکھتے ہوئے تمام ملازمین اور افسران کے یوٹیلیٹی الاؤنسز دوگنا کر دیے گئے ہیں۔
گریڈ 1 سے 6 تک کے ملازمین کا یوٹیلیٹی الاؤنس 6 ہزار روپے سے بڑھا کر 12 ہزار روپے ماہانہ کر دیا گیا ہے جبکہ گریڈ 7 سے 10 تک کے ملازمین کا الاؤنس 8 ہزار روپے سے بڑھا کر 16 ہزار روپے مقرر کیا گیا ہے۔
اسی طرح گریڈ 11 سے 15 تک کے ملازمین کا یوٹیلیٹی الاؤنس 10 ہزار روپے سے بڑھا کر 20 ہزار روپے کر دیا گیا ہے جبکہ گریڈ 16 کے افسران کا الاؤنس 12 ہزار روپے سے بڑھا کر 24 ہزار روپے ماہانہ مقرر کیا گیا ہے۔
