ملک بھر میں موسم کی بہتری اور ڈیموں سے پانی کے اخراج میں اضافے کے باعث بجلی کے بحران میں نمایاں کمی دیکھنے میں آئی ہے۔
سرکاری ذرائع کے مطابق بجلی کا شارٹ فال جو پہلے 6500 میگا واٹ تک پہنچ گیا تھا، اب کم ہو کر صرف 3 ہزار میگا واٹ رہ گیا ہے جس کے بعد اسلام آبادریجن میں بجلی کی لوڈشیڈنگ زیرو کردی گئی ہے۔
انڈس ریور سسٹم اتھارٹی (ارسا) کی جانب سے ڈیموں سے پانی کے اخراج میں اضافے کی بدولت پن بجلی (Hydel) کی پیداوار بڑھ کر 3400 میگا واٹ ہو گئی ہے۔
اس مثبت تبدیلی کے باعث وفاقی دارالحکومت اسلام آباد اور گردونواح میں بجلی کی لوڈشیڈنگ مکمل طور پر ختم (زیرو) کر دی گئی ہے۔
بجلی کی پیداوار اور طلب کے تازہ ترین اعداد و شمار کے مطابق ملک میں پن بجلی ذرائع سے بجلی کی پیداوار 34 سو میگا واٹ ہوگئی ہے۔ اسی طرح سے تھرمل پاور پلانٹ 8 ہزار میگا واٹ، سولر سے 350 میگاواٹ، نیوکلیر بجلی گھر 2880 میگاواٹ، بیاس پاور پلانٹ سے 80 میگا واٹ، جبکہ ونڈ پاور پلانٹس 1300 میگا واٹ بجلی پیدا کررہے ہیں۔
