پاکستان میں ایرانی سفیر رضا امیری مقدم نے سوشل میڈیا پر اپنے پیغام میں کہا ہے کہ پاکستان نے ایران سے غیر متزلزل یکجہتی اور حمایت کا مظاہرہ کیا۔
انہوں نے کہا کہ ایرانی قوم پاکستان کی حمایت کبھی فراموش نہیں کرے گی۔انہوں نے کہا کہ ایرانی قوم ایک باوقار اور فیصلہ کن فتح کا جشن منا رہی ہے، پاکستان نے ہمارے شانہ بشانہ کھڑے ہو کر یکجہتی کا مظاہرہ کیا،پاکستان کی حکومت اور عوام کا شکریہ۔
ایرانی سفیر نے کہا کہ جارحیت کے خلاف پاکستان ایران کے شانہ بشانہ کھڑا رہا، پاکستان نے ایران سے غیر متزلزل یکجہتی اور حمایت کا مظاہرہ کیا، انہوں نے کہا کہ یہ تاریخی جیت حق کی باطل پر فتح کی علامت ہے، یہ فتح امت مسلمہ کیلئے ایک قابل فخر یادگار جیت ہے۔
رضا امیری مقدم نے اصولی اور جرات مندانہ موقف پر صدرآصف زرداری، وزیراعظم شہباز شریف، فیلڈ مارشل عاصم منیر، نائب وزیراعظم اسحاق ڈار، وزیردفاع خواجہ آصف، اراکین سینیٹ، قومی اسمبلی، پاکستان کے علماء، سیاسی جماعتوں اور میڈیا کا بھی شکریہ ادا کیا۔
