بھارت کے سابق کپتان سنیل گواسکر نے اپنی قومی ذمہ داریاں نبھانے کے لئے آئی پی ایل چھوڑنے والے انگلش کرکٹرز کیخلاف کارروائی کا مطالبہ کردیا۔
انگلینڈ نے ورلڈکپ سے قبل پاکستان کیخلاف سیریز کیلئے اپنے اہم کھلاڑیوں کو آئی پی ایل سے واپس بلانے کا فیصلہ کیا ہے اور انگلش کرکٹرز اپنی اپنی ٹیموں کو چھوڑ کر وطن روانہ ہونا شروع ہوگئے ہیں جس پر بھارتی ٹیم کے سابق کپتان سنیل گواسکر سیخ پا ہیں۔
ایک اخباری کالم میں سنیل گواسکر نے لیگ پر نیشنل ڈیوٹی کو ترجیح دینے والے پلیئرز پر تنقید کے تیر برساتے ہوئے لکھا کہ فرنچائز کو اپنی دستیابی ظاہر کرنے کے بعد یوں ایونٹ سے دستبردار ہو کر کھلاڑیوں نے فرنچائز کو مایوس کیا ہے۔
سنیل گواسکر نے مطالبہ کیا کہ بی سی سی آئی کو چاہیے کہ ان فرنچائزوں کو اس بات کی اجازت دیں کہ وہ پلیئرز کے معاوضے سے کٹوتی کریں اور ساتھ ساتھ انگلش کرکٹ بورڈ کو پلیئرز فیس کا طے شدہ کمیشن بھی ادا نہ کیا جائے۔
سنیل گواسکر نے کہا کہ ای سی بی کو پلیئرز ریلیز فیس اس لیے دی جاتی ہے کیوں کہ بورڈ پلیئرز ریلیز کرے لیکن اگر بورڈ ایسا نہیں کر رہا تو اس پر بی سی سی آئی کو ایکشن لینا چاہیے۔
