سعودی عرب کے دارالحکومت ریاض میں گیس سلنڈر کے دھماکے میں 6 پاکستانی جاں بحق ہو گئے۔
میڈیا رپورٹ کے مطابق سعودی عرب کے دارالحکومت ریاض کے علاقے منفوحہ میں گزشتہ شب گیس سلنڈر کے دھماکے کا واقعہ پیش آیا۔ جہاں ایک رہائشی عمارت میں گیس سلینڈر پھٹنے سے شدید دھماکہ ہوا، جس کے باعث عمارت کے ایک حصے کو بھی نقصان پہنچا۔
جاں بحق ہونے والے تمام 6 افراد کا تعلق خیبر پختونخوا کے ضلع مانسہرہ سے بتایا جاتا ہے۔
پاکستانی سفارت خانے کا کہنا ہے کہ جاں بحق افراد کی میتوں کی وطن واپسی اور دیگر قانونی کارروائیوں کے لیے سعودی حکام سے رابطے میں ہیں۔ متاثرہ خاندانوں کو ہر ممکن سفارتی معاونت فراہم کی جائے گی۔
ابتدائی اطلاعات کے مطابق دھماکے کی وجوہات جاننے کے لیے متعلقہ سعودی حکام نے تحقیقات کا آغاز کر دیا ہے۔
واقعے کے بعد سعودی عرب میں مقیم پاکستانی کمیونٹی میں غم کی لہر دوڑ گئی ہے، جبکہ متاثرہ خاندانوں سے اظہارِ تعزیت کا سلسلہ جاری ہے۔
