بلوچستان کے ضلع کوہلو اور گرد و نواح میں زلزلے کے جھٹکے محسوس کیے گئے۔ جس سے لوگوں میں خوف و ہراس پھیل گیا۔
زلزلہ پیما مرکز کے مطابق زلزلے کی شدت 5.0 ریکارڈ کی گئی، زلزلے کی گہرائی 18 کلومیٹرجبکہ مرکز کوہلو سے 65 کلومیٹر دور شمال مشرق تھا۔ زلزلے کے جغرافیائی نقاط 30.40 درجے شمالی عرض بلد اور 69.68 درجے مشرقی طول بلد ریکارڈ کیے گئے۔
زلزلے کے بعد لوگ کلمہ طیبہ کا ورد کرتے ہوئے گھروں سے باہر نکل آئے ،ابتدائی اطلاعات کے مطابق زلزلے سے کسی جانی یا مالی نقصان کی اطلاع موصول نہیں ہوئی۔
واضح رہے کہ چار روز قبل بھی اسلام آباد اور خیبرپختونخوا کے مختلف شہروں سوات، شانگلہ، ملاکنڈ، مردان، خیبر، جمرود میں زلزلے کے شدید جھٹکے محسوس کیے گئے تھے۔
زلزلہ پیما مرکز کے مطابق ریکٹر اسکیل پر زلزلے کی شدت 5.4 ریکارڈ کی گئی تھی، زلزلے کی زیر زمین گہرائی 215 کلومیٹر رہی، زلرلے کا مرکز کوہ کندوکش کا پہاڑی سلسلہ تھا۔
