وفاقی دارالحکومت اسلام آباد کے پمز اسپتال میں روبوٹک سرجری متعارف کرانے کا فیصلہ کر لیا گیا۔
وزیراعظم کے کوآرڈینیٹر برائے صحت ڈاکٹر مختار احمد بھرتھ کا کہنا تھا کہ صحت کے شعبے میں بہتری اور اصلاحات ہمارا ایجنڈا اور مشن ہے، پاکستان انسٹیٹیوٹ آف میڈیکل سائنسز میں روبوٹک سرجری متعارف کرانے کا فیصلہ کیاگیا ہے۔
سرجری کے شعبے میں ترقی کے لئے 1465ملین کا پی سی ون منظورکر لیا گیا ہے، وزارت صحت سے جاری بیان کے مطابق ڈاکٹر مختار احمد بھرتھ نے کہا کہ سرکاری اسپتالوں کو جدید خطوط پر استوار کرنے کے لئے اہم اقدامات کئے جا رہے ہیں، پمز اسپتال میں روبوٹک سرجری متعارف کرانے کا بھی فیصلہ کیا گیا ہے۔
ان کا کہنا تھا کہ سرجری کے شعبے میں ترقی کیلئے 1465ملین کا پی سی ون منظور کر لیا گیا ہے، سرجنز کو صحت کے شعبے میں جدید تکنیکی سہولیات سے ہم آہنگ کیا جائے گا، اس منصوبے میں روبوٹک سرجری کے ساتھ موجودہ سرجیکل سروسز کو بھی اپ گریڈ کیا جائے گا۔
ڈاکٹر مختار بھرتھ نے کہا کہ سرجنز کو اعلیٰ مہارت کی تربیت دینے کے لئے تمام تر ضروری اقدامات کیے جائیں گے، مریض جدید ترین علاج کے آپشنز سے مستفید ہو سکیں گے۔
ڈاکٹر مختار احمد بھرتھ نے کہا کہ صحت کے شعبے میں غیر ملکی زرمبادلہ کی آمدنی میں خاطر خواہ اضافہ کرنا بھی وقت کی ضرورت ہے،ترقی یافتہ ممالک میں ملازمتوں کے حصول اور روبوٹک سرجری میں تربیت یافتہ ہنر مند افرادی قوت کے مواقع میسر ہوں گے،ان کا کہنا تھا کہ عوام کو اعلیٰ معیار کی طبی سہولیات کی فراہمی ہماری ترجیح ہے۔
