سپریم جوڈیشل کونسل نے ججز کے ضابطہ اخلاق میں اہم ترامیم کی منظوری دے دی۔
اعلامیے کے مطابق ضابطہ اخلاق میں وفاقی آئینی عدالت کا نام شامل کر دیا گیا ہے، جس کے بعد یہ ضابطہ وفاقی آئینی عدالت، سپریم کورٹ اور ہائی کورٹس کے ججز پر لاگو ہوگا۔
ترمیم شدہ ضابطہ اخلاق کے تحت ججز کے سماجی اور ثقافتی تقریبات میں شرکت پر عائد پابندی ختم کر دی گئی ہے، شق 12 میں ترمیم کے بعد ججز متعلقہ چیف جسٹس کی پیشگی اجازت سے سیاسی اور سفارتی تقریبات میں بھی شرکت کر سکیں گے تاہم ایسی تقریبات میں شرکت کے لیے چیف جسٹس سے اجازت لینا لازمی قرار دیا گیا ہے۔
اعلامیے کے مطابق ہائی کورٹ کے ججز کے خلاف شکایات یا رپورٹس کی اطلاع کے دائرہ کار کو بھی وسیع کر دیا گیا ہے، کسی جج سے متعلق رپورٹ موصول ہونے پر متعلقہ ہائی کورٹ کے چیف جسٹس دو دن کے اندر تین ججز پر مشتمل کمیٹی تشکیل دیں گے۔
