اسلام آباد: پاکستان ائیر پورٹس اتھارٹی کے شعبہ کمرشل نے مسافروں کی سہولت کے لیے ایک اور اہم قدم اٹھاتے ہوئے اسلام آباد ائیر پورٹ پر مزید سیلولر نیٹ ورکس کی فائیو جی سروسز فراہم کرنے کا فیصلہ کر لیا ہے۔
حکام کے مطابق ملک کے سب سے بڑے سیلولر نیٹ ورک جاز کے تعاون سے بھی ایئرپورٹ پر فائیو جی سروس فراہم کی جائے گی، اس حوالے سے جاز کے انجیئنرز نے ایئرپورٹ کا دورہ بھی کیا ہے۔
ذرائع کا کہنا ہے کہ ایئرپورٹ پر فائیو جی سروسز کی فراہمی کے لیے جدید موبائل فون ٹاور نصب کیا جائے گا، جس سے مسافروں کو تیز رفتار انٹرنیٹ سہولت میسر آئے گی۔
واضح رہے کہ اس سے قبل زونگ کی جانب سے اسلام آباد ایئرپورٹ پر فائیو جی سروس فراہم کی جا چکی ہے۔
پاکستان ایئرپورٹس اتھارٹی حکام کے مطابق وزیر اعظم کی ہدایت پر دیگر ملکی ایئرپورٹس پر بھی فائیو جی سہولیات کی فراہمی کے لیے اقدامات جاری ہیں۔
