اسلام آباد: پاکستان کرکٹ بورڈ (پی سی بی) کا ایشیا کپ کے مزید میچز سے بائیکاٹ یا کھیلنے کا حتمی فیصلہ نہ ہو سکا۔ جبکہ شیڈول کے مطابق پاکستان نے آج یو اے ای کے خلاف کھیلنا ہے۔
انٹرنیشنل کرکٹ کونسل (آئی سی سی) نے پاکستان کی درخواست پر میچ ریفری اینڈی پائی کرافٹ کی تبدیلی کا فیصلہ کر لیا گیا۔ جس کے بعد امکان ظاہر کیا جا رہا ہے کہ پاکستان آج یو اے کے خلاف اپنا میچ کھیلے گا۔
ذرائع کے مطابق آئی سی سی کے فیصلے بعد اب پی سی بی پاکستان کرکٹ ٹیم کے کھیلنے یا نہ کھیلنے کا فیصلہ کرے گی۔
واضح رہے کہ پاکستان نے بھارت کے خلاف میچ میں اپنائے جانے والے رویئے پر سخت ایکشن لیتے ہوئے ریفری اینڈی پائی کرافٹ تبدیل نہ کرنے کی صورت میں ایشیا کپ کے مزید میچز نہ کھیلنے کا فیصلہ کیا تھا۔
پی سی بی ذرائع کے مطابق پاکستان کے یو اے ای کے خلاف میچ کھیلنے یا نہ کھیلنے پر مشاورت جاری ہے۔ تاہم حکومت پاکستان کی ہدایت کے بغیر کوئی حتمی فیصلہ نہیں کیا جائے گا۔
