سابق سیکرٹری خارجہ اعزاز چودھری نے کہا ہے کہ پاک امریکا تعلقات سے اسلام آباد خوش اور دہلی پریشان ہے۔
ہم نیوز کے پروگرام صبح سے آگے میں بات کرتے ہوئے اعزاز چودھری نے کہا کہ صدر ٹرمپ اور فیلڈ مارشل کی ملاقات خوش آئند ہے،یہ اہم ملاقات پاکستان کے لیے اچھی خبر ہے۔
انہوں نے کہاکہ پاکستان کے امریکا کے ساتھ تعلقات اچھے ہی رہنے چاہئیں، ہم کبھی نہیں چاہتے کہ امریکا چین مقابلے میں پھنس جائیں،پاکستان کے ساتھ چین کے بہت قریبی تعلقات ہیں، جو ثابت بھی ہوگیا ہے۔
ان کا کہنا تھا کہ خطے میں امن کے لیے امریکا سے تعلقات رکھنا بھی ضروری ہے،پاکستان بھارت جنگ میں امریکا نے ایک اہم کردار ادا کیا،انہوں نے کہا کہ پاک امریکا تعلقات سے اسلام آباد خوش اور دہلی پریشان ہے۔
سابق سیکرٹری خارجہ نے کہا کہ ایران بھی پاکستان کے امریکا سے تعلقات بہتر ہونے پر خوش ہوگا، ایران کو پتہ ہے کہ پاکستان امریکا سے ایران کے حق کی بات کرے گا۔
