ڈسٹرکٹ اینڈ سیشن کورٹس اسلام آباد نے پی ٹی آئی رہنما زرتاج گل کے وارنٹ گرفتاری منسوخ کر دیئے.
عدالت سے وارنٹ گرفتاری جاری ہونے پر پی ٹی آئی رہنما زرتاج گل کمرہ عدالت پہنچیں۔ ان کے وکلاء نے وارنٹ منسوخ کرنیکی درخواست عدالت میں جمع کروائی ، جس میں کہا گیا کہ زرتاج گل کی دوسرے کیس میں اڈیالہ جیل پیشی تھی اسلئے پیش نہیں ہو سکی تھی، اب پیش ہو گئی ہیں۔
جج نے زرتاج گل کے وارنٹ گرفتاری منسوخ کرتے ہوئے ریمارکس دیئے کہ زرتاج گل خود عدالت میں پیش ہو گئی ہیں، اس لئے وارنٹ منسوخ کرتا ہوں۔
عدالت نے زرتاج گل کے وارنٹ گرفتاری منسوخ کرتے ہوئے کیس کی سماعت 12 مارچ تک ملتوی کر دی۔
خیال رہے کہ آج ہی سول جج مبشر حسن کی جانب سے وارنٹ گرفتاری جاری کئے گئے، جج نے کہا تھا کہ زرتاج گل متعدد بار طلبی کے باوجود عدالت پیش نہیں ہوئیں، زرتاج گل کے پیش نہ ہونے پر وارنٹ گرفتاری جاری کر رہا ہوں۔
