اسلام آباد: گورنر خیبر پختونخوا فیصل کریم کنڈی نے کہا ہے کہ پاکستان تحریک انصاف (پی ٹی آئی) کو اب پتا چل رہا ہے کہ ان کے درمیان میر صادق اور میر جعفر کون ہیں۔
گورنر خیبر پختونخوا فیصل کریم کنڈی نے میڈیا سے گفتگو کرتے ہوئے کہا کہ اسلام آباد میں بلائی گئی آل پارٹیز کانفرنس (اے پی سی) میں تمام جماعتوں نے شرکت نہیں کی۔ تاہم اے پی سی میں آنے والی جماعتوں کا شکریہ ادا کرتا ہوں۔ لیکن اسلام آباد میں اے پی سی بلانے کی ضرورت نہیں تھی۔
پی ٹی آئی پر تنقید کرتے ہوئے انہوں نے کہا کہ نفرت اور تقسیم پیدا کرنا پی ٹی آئی کا وطیرہ ہے۔ اور پی ٹی آئی کو اب پتا چل رہا ہے کہ ان کے درمیان میر صادق اور میر جعفر کون ہیں۔
فیصل کریم کنڈی نے کہا کہ اچھی بات ہے کہ ایک پارٹی کو معلوم ہوا کون ٹھیک ہے اور کون غلط ہے۔
وزیر اعلیٰ خیبر پختونخوا علی امین گنڈاپور پر تنقید کرتے ہوئے انہوں نے کہا کہ علی امین گنڈاپور آج کل اسلام آباد کے بہت چکر لگا رہے ہیں۔ اور انہوں نے وزارت اعلیٰ بچانے کے لیے اسلام آباد میں ڈیرے ڈالے ہوئے ہیں۔
