ملک میں مہنگائی کی مجموعی سالانہ شرح 0.52 فیصد پر آگئی ہے، ہفتہ وار مہنگائی کی شرح میں 0.77 فیصد کی کمی ریکارڈ کی گئی۔
ادارہ شماریات کے مطابق چینی کی فی کلو قیمت 141.36 روپے سے بڑھ کر 145.50 روپے ہو گئی ہے،فی درجن کیلے کی قیمت 124.76 روپے سے بڑھ کر 128.13 روپے تک پہنچ گئی ہے۔
گھی کی فی کلو قیمت 583.89 روپے سے بڑھ کر 585.81 روپے ہو گئی، اڑھائی کلو گھی کا ٹن 1496.18 روپے سے بڑھ کر 1498.48 روپے کا ہو گیا ہے۔
دال مونگ کی قیمت 405.65 روپے سے بڑھ کر 406.65 روپے فی کلو تک پہنچ گئی ہے، جلانے کیلئے فی من لکڑی کی قیمت 1322.99 روپے سے بڑھ کر 1324.66 روپے ہو چکی ہے۔
ادارہ شماریات کے اعداد و شمار کے مطابق لہسن کی فی کلو قیمت 686.13 روپے سے بڑھ کر 690.27 فی کلو ہو گئی جبکہ باتھ سوپ، چاول، ہوٹل پر تیار شدہ فی پلیٹ دال کی قیمت میں بھی اضافہ ہوا ہے۔
