امریکا اور ایران کے درمیان کشیدگی کے باعث تیل 87 ڈالر سے اوپر چلا گیا جبکہ دنیا بھر کی اسٹاک مارکیٹوں میں مندی کا رجحان دیکھنے میں آ رہا ہے۔
گزشتہ روز تیل کی قیمتوں میں تقریباً 4 فیصد اضافہ ہوا، برینٹ خام تیل کی قیمت 3.10 ڈالر یا 3.68 فیصد اضافے کے ساتھ 87.33 ڈالر فی بیرل پر پہنچ گئی، جو گزشتہ ایک ماہ میں اس کی بلند ترین سطح ہے۔
دوسری جانب امریکی ویسٹ ٹیکساس انٹرمیڈیٹ خام تیل کی قیمت 3.14 ڈالر یا 3.98 فیصد کے اضافے کیساتھ 82.09 ڈالر ، مربان خام تیل 3.91 فیصد اضافے کے ساتھ 80.77 ڈالر جبکہ ڈبلیو ٹی آئی مڈلینڈ 3.10 فیصد اضافے کے ساتھ 81.81 ڈالر پر پہنچ گیا۔
قیمتوں میں تیزی کا یہ رجحان پورے انرجی کمپلیکس (توانائی کی مارکیٹ) میں پھیل گیا، جس کے نتیجے میں امریکی گیسولین فیوچرز میں 3.86 فیصد اور ڈچ ٹی ٹی ایف نیچرل گیس میں 3.41 فیصد کا اضافہ دیکھا گیا۔
اسی طرح امریکی نیچرل گیس کی قیمتوں میں 1.01 فیصد اور جاپان-کوریا ایل این جی بینچ مارک میں 0.92 فیصد کا اضافہ ریکارڈ کیا گیا۔
