اسلام آباد: سپریم کورٹ نے سندھ اور خیبر پختونخوا حکومتوں سے قرآن پاک کی لازمی تعلیم پر جواب مانگ لیا۔
سپریم کورٹ پاکستان میں قرآن پاک کی تعلیم لازمی قرار دینے کی درخواست پر سماعت ہوئی۔ وفاق، پنجاب اور بلوچستان حکومتوں نے جوابات جمع کروا دیئے۔ جبکہ سندھ اور خیبرپختونخوا حکومت نے جوابات جمع کرانے کے لیے وقت مانگ لیا۔
جسٹس جمال مندوخیل نے ریمارکس دیئے کہ جواب کے مطابق وفاقی حکومت نے قرآن پاک کی تعلیم کے لیے اقدامات شروع کر دیئے ہیں۔ اور حکومت کو اپنا کام کرنے دیں عدالت کیوں مداخلت کرے؟
درخواست گزار انیق کھٹانہ نے مؤقف اختیار کیا کہ حکومتیں کام کر رہی ہوتیں تو 5 سال سے عدالتوں میں چکر نہ لگا رہا ہوتا۔ قانون کے مطابق وہ ترجمہ رائج ہو سکتا ہے جو متفقہ ہو۔ اور وفاقی حکومت کی جانب سے ترجمہ کی منظوری دینا بھی لازمی ہے۔
انیق کھٹانہ نے کہا کہ کسی صوبے یا وفاق نے نوٹیفکشن منسلک نہیں کیے۔
