پشاور ہائیکورٹ نے صوبائی اسمبلی کی مخصوص نشستوں پر منتخب ہونے والے ارکان کو حلف لینے سے روک دیا۔
مخصوص نشستوں کے حوالے سے پاکستان تحریک انصاف پارلیمنٹرینز کی درخواست پر پشاور ہائیکورٹ کے جسٹس سید ارشد علی اور جسٹس ڈاکٹر خورشید اقبال پر مشتمل دو رکنی بینچ نے سماعت کی۔
عدالت نے الیکشن کمیشن کو نوٹس جاری کرتے ہوئے حکم دیا کہ آئندہ سماعت تک ارکان سے حلف نہ لیا جائے۔ وکیل درخواست گزار سلطان محمد خان ایڈووکیٹ نے کہا کہ الیکشن کمیشن نے مخصوص نشستوں کی کیلکولیشن ٹھیک طریقے سے نہیں کی۔
جسٹس ارشد علی نے استفسار کیا کہ آپ نے مخصوص نشستوں کے لیے فہرست جمع کی؟ وکیل نے بتایا کہ جی ہم نے جمع کی تھی ، صرف ایک خواتین کی سیٹ دی گئی تھی۔ ہم ایک سے زائد سیٹوں کے حقدار ہیں۔
