آئی ایم ایف نے اعلامیہ جاری کرتے ہوئے پاکستان کے ساتھ مذاکرات کو مثبت قرار دے دیا۔
اعلامیہ میں کہا گیا کہ پاکستان کو موجودہ قرض پروگرام کے اہداف پر سختی سے عمل درآمد کی ضرورت ہے، اہداف پرسختی سے عمل درآمد عوام کا معیار زندگی بہتر کرسکتا ہے۔
اعلامیے میں کہا گیا کہ مشن چیف نیتھن پورٹر کی سربراہی میں 12 تا 15 نومبر مذاکرات ہوئے، مذاکرات میں وفاقی اور صوبائی حکومتوں کے مذاکرات کے ساتھ نجی شعبہ کے نمائندوں سے بھی بات چیت اور تبادلہ خیال ہوا۔
آئی ایم ایف اعلامیہ میں مذاکرات کو مثبت قرار دیتے ہوئے کہا کہ مذاکرات میں معاشی اصلاحات، معاشی پالیسیز اور معاشی ترقی کے لیے حکومتی کارکردگی کا جائزہ لیا گیا، معاشی امور پر پاکستانی حکام کے ساتھ بات چیت مثبت رہی۔
مشن چیف نیتھن پورٹر نے کہا کہ مجموعی طور پر مذاکرات مثبت رہے، حکومت ٹیکس نہ دینے والے شعبہ سے ٹیکس آمدن بڑھانے کیلئے پرعزم ہے سماجی تحفظ اور ترقی میں صوبوں کے کردار کو بڑھانے پربھی بات چیت ہوئی۔
