چیئرمین پی سی بی محسن نقوی نے پرو ہاکی لیگ کیلئے کوالیفائی کرنے پر قومی ہاکی ٹیم کے کھلاڑیوں کیلئے فی کس 10 لاکھ روپے انعام کا اعلان کیا ہے۔
محسن نقوی سے قومی ہاکی ٹیم کے کپتان عماد شکیل بٹ نے ملاقات کی جس میں انہوں نے محسن نقوی کو نشان امتیاز ملنے پر مبارکباد دی۔
ہاکی ٹیم کے کپتان نے چیئرمین پی سی بی کو ہاکی کی بحالی اور پرو ہاکی لیگ میں شرکت سے متعلق امور سے آگاہ کیا ، ملاقات میں ہاکی کے کھلاڑیوں کی ویلفیئر اور ری ہب کے ایشوز پر بھی تبادلہ خیال کیا گیا۔
اس موقع پر محسن نقوی کا کہنا تھا کہ ہاکی کھلاڑیوں کے میڈیکل و فٹنس کیسز کو پی سی بی میڈیکل ٹیم ہینڈل کرے گی، ہاکی کے کھلاڑیوں کے ویزا ایشوز کو بھی حل کرایا جائے گا۔
انہوں نے کہا کہ پرو ہاکی لیگ کیلئے قومی ٹیم کا کوالیفائی کرنا اعزاز ہے ، انہوں نے ہاکی کی بحالی کیلئے ہر ممکن معاونت کی یقین دہانی کرائی۔
