بھارت کی مشرقی ریاست جھارکھنڈ میں مون سون کے دوران آسمانی بجلی گرنے کے مختلف واقعات میں کم از کم 14 افراد ہلاک جبکہ متعدد زخمی ہوگئے۔
بھارتی میڈیا کے مطابق ریاست جھارکھنڈ کے مختلف اضلاع میں منگل کے روز ہونے والی شدید بارش اور گرج چمک کے دوران آسمانی بجلی گرنے کے متعدد واقعات پیش آئے۔ ان حادثات میں سب سے زیادہ متاثر ضلع گریڈیہ رہا، جہاں 10 افراد جان کی بازی ہار گئے۔
پولیس حکام کے مطابق ہلاک ہونے والوں میں اکثریت ان کسانوں اور زرعی مزدوروں کی تھی جو بارش کے باوجود کھیتوں میں کام کر رہے تھے۔ اچانک گرج چمک کے ساتھ بجلی گرنے سے انہیں سنبھلنے کا موقع نہ مل سکا، جبکہ مختلف مقامات پر کم از کم 7 افراد زخمی بھی ہوئے، جنہیں فوری طور پر قریبی اسپتالوں میں منتقل کر دیا گیا۔
ریاستی انتظامیہ نے متاثرہ علاقوں میں امدادی کارروائیاں شروع کر دی ہیں جبکہ ضلعی حکام کو ہدایت کی گئی ہے کہ زخمیوں کو فوری طبی سہولیات فراہم کی جائیں اور متاثرہ خاندانوں کی مدد یقینی بنائی جائے۔
بھارتی محکمہ موسمیات نے خبردار کیا ہے کہ جھارکھنڈ میں آئندہ چند روز تک موسلا دھار بارش، گرج چمک اور آسمانی بجلی گرنے کے مزید امکانات موجود ہیں۔
شہریوں، خصوصاً کسانوں اور کھلے میدانوں میں کام کرنے والے افراد کو ہدایت کی گئی ہے کہ خراب موسم کے دوران غیر ضروری طور پر باہر نکلنے سے گریز کریں اور محفوظ مقامات پر رہیں۔
