لاہور: پاکستان سپر لیگ (پی ایس ایل) کی گورننگ کونسل کا اہم اجلاس طلب کر لیا گیا۔ جس میں لیگ کی تمام 8 فرنچائز شرکت کریں گے۔
ذرائع کے مطابق پی ایس ایل کی گورننگ کونسل کا اہم ورچوئل اجلاس 15 جنوری کو ہو گا۔ اجلاس میں پی ایس ایل کی توسیع سے متعلق تمام معاملات زیر بحث آئیں گے۔
اجلاس میں آئندہ سیزنز میں نئی ٹیموں کی شمولیت پر غور کیا جائے گا۔ جبکہ سیزن 11 میں فرنچائزز کو کھلاڑی ڈائریکٹ سائن کرنے کے معاملے پر بھی تفصیلی بات چیت متوقع ہے۔
اجلاس میں پی ایس ایل کی ریٹنشن پالیسی میں ممکنہ تبدیلیوں پر بھی مشاورت کی جائے گی۔ اور نئی ٹیموں کو ابتدائی سیزن میں خصوصی سہولتیں فراہم کرنے کی تجویز بھی زیر غور آئے گی۔
ذرائع کے مطابق گورننگ کونسل اجلاس میں پلیئر ڈرافٹ اور آکشن ماڈل پر بھی بحث کی جائے گی۔ تاکہ لیگ کے مستقبل کے لیے بہتر حکمت عملی ترتیب دی جا سکے۔
