متحدہ قومی موومنٹ (ایم کیو ایم) پاکستان کے مرکزی رہنما ڈاکٹر فاروق ستار نے کہا ہے کہ گورنر کی تبدیلی کی صورت میں حکومت میں رہنے کا کوئی جواز نہیں ہوگا۔
انہوں نے اپنے ایک بیان میں گورنر سندھ کی تبدیلی کے حوالے سے خبروں پر اظہارِ خیال کیا۔ انہوں نے کہا کہ پاکستان مسلم لیگ (ن) کے ساتھ یہی طے ہوا تھا کہ سندھ کے گورنر کامران ٹیسوری ہی رہیں گے۔
فاروق ستار کا کہنا تھا کہ کامران ٹیسوری کو ہٹانے کی قیاس آرائیاں بھی ہوتی رہیں۔ ن لیگ نے گورنر سندھ کو تبدیل کرنے کا یکطرفہ فیصلہ کیا تو ایم کیو ایم کے حکومت میں رہنے کا کوئی جواز نہیں ہوگا۔
خیال رہے کہ کہ نائب وزیراعظم اسحاق ڈار نے اس سے قبل اپنے ایک بیان میں کہا تھا کہ بشیر میمن کو گورنر سندھ بنائے جانے کی خبروں میں صداقت نہیں۔ پیپلزپارٹی سے مشاورت جاری ہے، اس حوالے سے چند روز میں فیصلہ ہوجائے گا۔
