سعودی عرب کے مختلف علاقوں میں جاری بارشوں کا سلسلہ جمعہ 2 اکتوبر تک جاری رہنے کی پیشگوئی کی گئی ہے جبکہ آج اور کل بعض علاقوں میں موسلادھار بارش کا بھی امکان ہے۔
سعودی عرب کے نیشنل سینٹر فار میٹرولوجی کے مطابق مملکت کے مختلف علاقوں میں جمعہ تک بارش کا سلسلہ جاری رہنے کی توقع ہے جبکہ جازان، عسیر، الباحہ، مکہ مکرمہ اور مدینہ منورہ کے متعدد علاقوں میں موسلادھار بارش کی پیشگوئی کی گئی ہے۔
موسمیاتی مرکز کے مطابق آج اور کل بعض علاقوں میں بارش کی شدت میں اضافہ ہوسکتا ہے جس کے باعث تیز ہوائیں، افقی حدِ نگاہ تقریباً ختم ہونے، ژالہ باری اور اچانک سیلاب کا امکان ہے۔ ساحلی علاقوں میں بلند لہروں کے ساتھ بعض مقامات پر بگولے یا پانی کی سطح پر بننے والے گردابی طوفان بھی پیدا ہونے کا امکان ظاہر کیا گیا ہے۔
نیشنل سینٹر فار میٹرولوجی کے مطابق جازان ریجن کے مختلف علاقوں میں درمیانی سے موسلادھار بارش متوقع ہے۔
حروب، الریث، الدائر، العیدابی، فیفا، العارضہ، الحرث، الطوال، الدرب، بیش، صبیا، ضمد، ابو عریش، احد المسارحہ اور صامطہ میں درمیانی سے موسلادھار بارش کی پیشگوئی کی گئی ہے۔جازان اور فرسان میں درمیانی درجے کی بارش متوقع ہے۔
