سعودی عرب، طائف میں حوثی ڈرون حملہ ناکام، ملبہ گرنے سے یمنی شہری ہلاک، پاکستانی زخمی

سعودی عرب کے شہر طائف میں فضا میں تباہ کیے گئے ایک ڈرون کا ملبہ گرنے سے ایک شخص ہلاک جبکہ دو افراد زخمی ہوگئے۔

بی بی سی کے مطابق سعودی محکمہ شہری دفاع (سول ڈیفنس) نے بتایا کہ ڈرون کو فضا میں تباہ کیا گیا تاہم اس کا ملبہ طائف شہرمیں گرنے سے جانی و مالی نقصان ہوا۔

محکمہ شہری دفاع نے اپنے ’ایکس’ اکاؤنٹ پر واقعے کی تفصیلات جاری کرتے ہوئے بتایا کہ ملبہ گرنے کے نتیجے میں متعدد عمارتوں اور گاڑیوں کو بھی نقصان پہنچا ہے۔

سعودی عرب کی سرکاری خبررساں ایجنسی سعودی پریس ایجنسی (SPA) نے دعویٰ کیا ہے کہ فضا میں تباہ کیا گیا ڈرون حوثیوں کی جانب سے داغا گیا تھا۔

سعودی پریس ایجنسی کے مطابق واقعے میں ہلاک ہونے والا شخص یمنی شہری ہے جبکہ زخمی ہونے والے دو افراد میں ایک پاکستانی شہری بھی شامل ہے۔پاکستانی شہری کی حالت تشویشناک بتائی گئی ہے جبکہ دوسرے زخمی کی قومیت سے متعلق تفصیلات سامنے نہیں آئیں۔

سعودی عرب کے شہر طائف میں ’حوثی ڈرون‘ کا ملبہ گِرنے سے ایک یمنی شہری ہلاک، پاکستانی شہری شدید زخمی
مکمل تفصیلات: https://t.co/ShNIMFNN0n https://t.co/8ubAqQjNQY

— BBC News اردو (@BBCUrdu) September 17, 2026