مون سون بارشوں کا زوردار اسپیل جاری ہے، پنجاب میں چھتیں گرنے سے گیارہ افراد جاں بحق ہو گئے۔
لاہور میں بارش کے با عث ٹھوکر نیاز بیگ کے گاؤں مرید وال میں گھر کی چھت گرنے سے ایک ہی خاندان کے 5 افراد جاں بحق اور 2 زخمی ہوگئے۔
ریسکیو ذرائع کے مطابق جاں بحق ہونے والوں میں میاں بیوی، بہو اور 2 پوتیاں شامل ہیں۔ بارشوں سے رائیونڈ میں گھر کی چھت گرنے سے 3افراد جاں بحق ہوئے۔
ریسکیو ذرائع کے مطابق رائیونڈ کے علاقے کوٹ جمال پورہ میں بھی گھر کی چھت گر گئی جس سے ایک شخص جاں بحق ہو گیا۔ واضح رہے کہ لاہور اور گردونواح میں رات کو موسلا دھار بارش سے متعدد شاہراہیں ڈوب گئیں۔
فیصل آباد سیتانہ روڈ پر مکان کی چھت گر نے سے میاں بیوی جاں بحق ہو گئے ہیں، ریسکیو ذرائع کے مطابق چھت گرنے سے 3بچے بھی زخمی ہوئے جنہیں اسپتا ل منتقل کر دیا گیا ہے، سمندری میں بارش کے باعث مکان کی چھت گر نے سے 2افرادزخمی ہو گئے۔
