پی ٹی آئی رہنما ڈاکٹر یاسمین راشد کی کوٹ لکھپت جیل میں طبیعت ناساز ہوگئی ہے۔
ڈاکٹر یاسمین راشد کو سروسز اسپتال منتقل کر دیا گیا،اسپتال ذرائع کا کہنا ہے گرمی کی وجہ سے یاسمین راشد کا جیل میں بلڈ پریشر ہائی ہوا،جس کے باعث وہ جیل میں بے ہوش ہو گئیں۔
یاد رہے چند روز قبل ڈاکٹر یاسمین راشد نے کہا تھا کہ جیل میں انہیں بلیوں اور چھپکلیوں سے مقابلہ کرنا پڑتا ہے۔ جیل میں خوش ہوں، جتنی زیادتیاں کرنی ہیں کرو،آدھا دن مقابلے میں اور آدھا دن کتابیں پڑھنے میں گزرتا ہے۔
دوسری طرف 9 مئی کو شیر پاؤ پل پر تقاریر، جلاؤ گھیراؤ، ن لیگ کا دفتر جلانے کے مقدمات میں ڈاکٹر یاسمین راشد کی 2 مقدمات میں درخواست ضمانت ملتوی کردی گئی۔
یاسمین راشد کی 2 مقدمات میں درخواست ضمانت پر انسداد دہشت گردی عدالت کے جج ارشد جاوید نے ضمانتوں پر سماعت کی۔
