بھارتی سینما کے لیجنڈری اداکار دھرمیندر کے انتقال کے چند ہفتوں بعد، ان کی 90ویں سالگرہ کے موقع پر ان کی بیٹی اور اداکارہ ایشا دیول نے اپنے والد کے نام ایک جذباتی خراجِ عقیدت پیش کیا۔
ایشا دیول نے پیر کے روز انسٹاگرام پر دھرمیندر کے ساتھ تصاویر شیئر کیں اور والد کے ساتھ وابستہ گہرے رشتے اور یادوں کا ذکر کرتے ہوئے کہا کہ میرے پیارے پاپا، ہمارا رشتہ ہمیشہ مضبوط رہا، چاہے زمین ہو یا آسمان، ہم ہمیشہ ساتھ ہیں۔ اس زندگی کے سفر میں میں نے آپ کو اپنے دل کی گہرائیوں میں سمیٹ لیا ہے تاکہ آپ ہمیشہ میرے ساتھ رہیں۔
View this post on Instagram
ایشا دیول نے دھرمیندر کے چھوڑے گئے ورثے کا حوالہ دیتے ہوئے کہا کہ آپ کی قیمتی یادیں، زندگی کے سبق، رہنمائی، بے لوث محبت اور وہ وقار و طاقت جو آپ نے مجھے بطور بیٹی دی، ان کا کوئی نعم البدل نہیں، میں آپ کو بہت شدت سے یاد کرتی ہوں، پاپا آپ کی وہ محافظانہ باہیں، مضبوط ہاتھ اور میرا نام پکارتی ہوئی آپ کی آواز جس میں محبت بھری گفتگو، ہنسی اور شاعری شامل تھی۔
