بالی ووڈ کے معروف اداکار رنویر سنگھ کے خلاف کرناٹک کے دارالحکومت بنگلور میں مذہبی جذبات مجروح کرنے کے الزام میں مقدمہ درج کر لیا گیا ہے۔
بھارتی میڈیا رپورٹس کے مطابق یہ شکایت ایک مقامی وکیل کی جانب سے دائر کی گئی، جس میں مؤقف اختیار کیا گیا ہے کہ رنویر سنگھ نے گوا میں منعقد ہونے والے انٹرنیشنل فلم فیسٹیول آف انڈیا (International Film Festival of India) کی اختتامی تقریب کے دوران اپنی فلم کے ایک منظر میں کرناٹک کے ساحلی علاقوں میں مانے جانے والے مقدس دیوتا چوونڈی دیوا کو نامناسب انداز میں پیش کیا۔
درخواست گزار کے مطابق مذکورہ دیوتا کو فلمی منظر میں ایک خوفناک کردار کے طور پر دکھایا گیا، جو نہ صرف مقامی مذہبی روایات کی توہین ہے بلکہ ہندو برادری کے مذہبی جذبات کو شدید ٹھیس پہنچانے کے مترادف بھی ہے۔
شکایت میں مزید کہا گیا ہے کہ چوونڈی دیوا کرناٹک کے ساحلی علاقوں میں ایک مقدس اور قابلِ احترام مذہبی علامت کی حیثیت رکھتے ہیں، اور ان کی اس نوعیت کی عکاسی معاشرتی ہم آہنگی کے لیے نقصان دہ ہو سکتی ہے۔
