لاہور: پنجاب بھر کے سرکاری اسکولوں میں مزید ٹیچر انٹرنز بھرتی کرنے کا فیصلہ کر لیا گیا۔
ساڑھے 12 ہزار کے قریب ایس ٹی آئیز کی بھرتی کا اشتہار اگلے ہفتے دیا جائے گا، پہلے سے کام کرنے والے انٹرنز ٹیچرز کے کنٹریکٹ میں 8 ماہ کی توسیع کی گئی تھی۔
محکمہ اسکول ایجوکیشن پنجاب ( punjab ) مستقبل میں کوئی مستقل ٹیچر نہ رکھنے پر غور کر رہا ہے، محکمہ کی جانب سے ٹیچر انٹرنز کا پول بنا کر ضرورت پڑنے پر ٹیچر رکھے جائیں گے۔
مزید 12 ہزار 500 ٹیچرز کے بعد انٹرنز کی تعداد 25 ہزار ہو جائے گی، محکمہ اسکول ایجوکیشن کی جانب سے ٹیچر انٹرنز کو تنخواہ ماہانہ بنیاد پر دی جائے گی۔
پنجاب کے وزیر تعلیم رانا سکندر حیات نے کہا ہے کہ انٹرنز ٹیچر کو سبجیکٹ اسپیشلسٹ کی بنیاد پر اسکولوں میں رکھا جائے گا، ٹیچنگ لائسنس سسٹم کے اجرا کے بعد ٹیسٹ پاس کرنے والے انٹرنز کو مستقل کرنے پر غور ہو گا۔
