امریکی شہری نے ربڑ کی چپلوں کا سب سے بڑا ذخیرہ جمع کر کے عالمی ریکارڈ بنا لیا۔
امریکی ریاست کنیکٹی کٹ سے تعلق رکھنے والے ڈوگی لش کو دنیا بھر میں کروک کنگ کے نام سے پکارا جا رہا ہے, انہوں نے سب سے زیادہ ربڑ کی چپلیں جمع کرکے گنیز ورلڈ ریکارڈ کی فہرست میں اپنا نام شامل کرا دیا۔
ڈوگی لش کے پاس کروکس نامی ربڑ کی چپلوں کے 3 ہزار 803 جوڑے موجود ہیں، جنہیں جمع کرنے کا سلسلہ انہوں نے تقریباً 18 سال پہلے شروع کیا تھا۔ اس منفرد شوق نے نہ صرف انہیں عالمی شہرت دلائی بلکہ ان کے لیے بچپن کا خواب بھی حقیقت میں بدل گیا۔
انہوں نے کہا کہ جب بھی اسکول میں بک فیئر لگتا تھا، میں سب سے پہلے گنیز ورلڈ ریکارڈز کی کتابوں کی طرف بھاگتا تھا، نوعمری میں اپنی ایک ڈائری میں زندگی کے مقاصد تحریر کئے تھے، جن میں ایک نایاب اور بڑا کلیکشن جمع کرنے کا شوق بھی شامل تھا، جو بالآخر عالمی ریکارڈ کی شکل اختیار کر گیا۔
