اوقاف کے زیرانتظام پنجاب کے مختلف درباروں میں ڈیڑھ ارب روپے کی مبینہ کرپشن کا انکشاف ہوا ہے۔
یہ اربوں روپے کا مبینہ غبن اوقاف ڈیپارٹمنٹ کی ایک سپیشل آڈٹ رپورٹ میں سامنے آیا ہے، ہم انویسٹی گیشن ٹیم نے رپورٹ کی کاپی حاصل کر لی۔
رپورٹ میں لاہورکے داتا دربار کے فنڈز میں 86 کروڑ روپے کی مبینہ غبن کا انکشاف ہواہے، داتا دربارکے کھاتوں سے مالی سال 2015 سے 2018 کے دوران 86 کروڑ روپے نکالے گئے۔
رپورٹ میں انکشاف کیا گیا کہ 33 ٹرانز یکشن کی گئیں لیکن کہاں خرچ ہوئے اس کا ریکارڈ معلوم نہیں، پاک پتن شریف دربار میں 19 کروڑ کی 48 مشتبہ ٹرانزیکشن کی گئی۔
رپورٹ میں انکشاف ہوا ہے کہ چھ سو سے زائد جھنگ اور اوکاڑہ میں اوقاف کی کمرشل دکانوں کے کرایے میں ساڑھے تیرہ کروڑ کا مبینہ فراڈ کیا گیا، سینکڑوں کنال کمرشل جائیدادیں صرف 1 روپے سالانہ 99 سال کے لئے کرائے پر دینے کا انکشاف بھی ہوا ہے۔
