سوشل میڈیا پر معروف گلوکارہ عابدہ پروین کے انتقال سے متعلق گردش کرنے والی خبریں جھوٹی اور بے بنیاد ہیں۔ عابدہ پروین کی بیٹی نے ان خبروں کی واضح طور پر تردید کرتے ہوئے کہا ہے کہ ان کی والدہ بالکل خیریت سے ہیں اور صحت مند ہیں۔
تفصیلات کے مطابق صورتحال کی وضاحت کرتے ہوئے عابدہ پروین کی بیٹی نے بتایا کہ سوشل میڈیا پر پھیلائی جانے والی اطلاعات میں کوئی صداقت نہیں۔ انہوں نے کہا کہ جمعرات کے روز لاہور کے علاقے دلگران چوک کی ایک رہائشی خاتون کا انتقال ہوا تھا جن کا نام عابدہ پروین تھا، جس کی بنیاد پر غلط فہمی پیدا کی گئی۔
انہوں نے کہا کہ یہ تمام خبریں سراسر غلط ہیں، میری والدہ کے انتقال سے متعلق جھوٹی معلومات پھیلا کر مداحوں کو گمراہ کیا جا رہا ہے۔
بیٹی نے عوام سے اپیل کی کہ وہ صرف مستند ذرائع پر ہی اعتماد کریں اور غیر مصدقہ معلومات کو آگے پھیلانے سے گریز کریں۔
