امریکی صدر ڈونلڈ ٹرمپ نے ایران کے خلاف جوہری ہتھیار استعمال کرنے کا امکان مسترد کرتے ہوئے کہا ہے کہ امریکا کو ان کی ضرورت نہیں ہے۔
ڈونلڈ ٹرمپ کا یہ بیان ایسے وقت میں سامنے آیا ہے جب سی این ین نے دعویٰ کیا تھا کہ امریکی فوج ایران کے خلاف ممکنہ نئے حملوں کے منصوبوں پر کام کررہی ہے جن میں مبینہ طور پر ایران کے توانائی کے بنیادی ڈھانچے اور جوہری تنصیبات کو نشانہ بنانے کے لیے ’مدر آف آل بمز‘ کا ممکنہ استعمال بھی شامل ہے۔
امریکی ٹی وی چینل نیوز میکس کو انٹرویو دیتے ہوئے ڈونلڈ ٹرمپ نے کہا کہ امریکا ایران کے خلاف جوہری ہتھیار استعمال نہیں کرے گا۔ انہوں نے واضح کیا کہ’مدر آف آل بمز‘ جوہری ہتھیار نہیں بلکہ ایک انتہائی طاقتور روایتی بم ہے۔
انہوں نے اس بات پر زور دیا کہ ایران کے خلاف اس ہتھیار کے ممکنہ استعمال کو جوہری حملے کے طور پر نہیں دیکھا جانا چاہیے۔
انٹرویو کے دوران جب امریکی صدر سے اسرائیلی وزیراعظم بنیامین نیتن یاہو پر اعتماد کے بارے میں پوچھا گیا تو ٹرمپ نے جواب دیا کہ وہ سچ پوچھیں تو کسی پر اعتماد نہیں کرتے۔ان کا کہنا تھا کہ سیاست کی دنیا میں وہ کسی پر بھروسا نہیں کرتے۔
