بھارت کے خلاف پانچ میچوں کی ٹی ٹوئنٹی سیریز سے قبل نیوزی لینڈ کو بڑا دھچکا لگا ہے جہاں انجری کے باعث مارک چیپمین اور زیک فولکس سیریز سے باہر ہوگئے ہیں۔
نیوزی لینڈ کرکٹ ٹیم کے اہم کھلاڑی مارک چیپمین گزشتہ ماہ یورپ میں ٹی 20 لیگ کے دوران ہیم اسٹرنگ انجری کا شکار ہوئے تھے جس کے باعث وہ بھارت کے خلاف پوری پانچ میچوں کی ٹی ٹوئنٹی سیریز نہیں کھیل سکیں گے۔ ان کی نظریں اب بھارت کے خلاف ون ڈے سیریز میں واپسی پر ہیں۔
دوسری جانب فاسٹ بولر زیک فولکس کولہے کے پٹھے میں تکلیف کا شکار ہیں۔ ان کی میدان میں واپسی کے حوالے سے تاحال کوئی حتمی مدت طے نہیں کی گئی۔
دونوں کھلاڑیوں کی انجری کے بعد آل راؤنڈر جوش کلارکسن اور فاسٹ بولر بلیئر ٹکنر کو نیوزی لینڈ کے 16 رکنی اسکواڈ میں شامل کرلیا گیا ہے۔
نیوزی لینڈ کے ہیڈ کوچ روب والٹر نے مارک چیپمین اور زیک فولکس کی انجری پر افسوس کا اظہار کرتے ہوئے کہا کہ وہ دونوں کی جلد صحت یابی کے خواہاں ہیں۔
