وزیراعظم شہباز شریف نے کہا ہے کہ سندھ طاس معاہدہ ایک پابند بین الاقوامی معاہدہ ہے اور اسے یکطرفہ طور پر معطل رکھنے کا بھارتی فیصلہ کسی قانونی بنیاد کا حامل نہیں۔
شہباز شریف سے اقوام متحدہ کے سیکرٹری جنرل انتونیو گوتریس نے وزیراعظم ہاؤس میں ملاقات کی، جس میں عالمی و علاقائی امن، تنازعات کے پرامن حل، مسئلہ کشمیر، افغانستان، فلسطین اور اقوام متحدہ میں اصلاحات سمیت مختلف امور پر تبادلہ خیال کیا گیا۔
واضح رہے کہ سیکرٹری جنرل اقوام متحدہ انتونیو گوتریس آج کل پاکستان کے دورے پر ہیں۔ اس سے قبل انہوں نے فیلڈ مارشل سید عاصم منیر سے بھی ملاقات کی۔ جبکہ گزشتہ روز صدر مملکت کی جانب سے انہیں نشان امتیاز سے بھی نوازا گیا۔
شہباز شریف نے انتونیو گوتریس کا خیرمقدم کرتے ہوئے اقوام متحدہ کے منشور اور تنازعات کے پرامن حل کے لیے ان کے اصولی عزم کو سراہا۔ اور عالمی امن و سلامتی کے لیے سیکرٹری جنرل کی نمایاں خدمات کو بھی خراج تحسین پیش کیا۔
