یوٹیوب نے ویڈیوز کے ویوز گننے کے طریقہ کار میں بڑی تبدیلی کا اعلان کردیا ہے، جس کے تحت 24 اگست 2026 سے ویڈیو چلنا شروع ہوتے ہی پہلے فریم سے ویو شمار کیا جائے گا۔
واضح رہے اس وقت یوٹیوب پر مختلف ویڈیو فارمیٹس میں ویوز گننے کے الگ الگ طریقہ کار ہیں۔
تبدیلی کا مقصد مختلف ویڈیو فارمیٹس میں ویوز گننے کے الگ الگ طریقہ کار کو ختم کرکے پورے پلیٹ فارم پر ایک ہی معیار نافذ کرنا ہے۔ نیا طریقہ کار 24 اگست 2026 سے دنیا بھر میں تمام ویڈیو فارمیٹس پر لاگو ہوگا۔
یوٹیوب کا کہنا ہے کہ گزشتہ سال شارٹس کے لیے عوامی ویوز گننے کے طریقہ کار میں تبدیلی کی گئی تھی تاکہ یہ بہتر انداز میں ظاہر کیا جاسکے کہ صارفین مختصر ویڈیوز کو کس طرح دیکھتے ہیں۔ اب اسی معیار کو یوٹیوب کے دیگر تمام ویڈیو فارمیٹس تک توسیع دی جارہی ہے۔
Starting 8/24, views will count the moment a video begins to play (w/ no minimum watch time) across all formats (VOD, Shorts, & Live). We’re standardizing views to reflect creators’ true exposure across YouTube, making it easier to show their value to brand partners.
This update…
— TeamYouTube (@TeamYouTube) August 17, 2026
کمپنی کے مطابق کریئیٹرز کی جانب سے مسلسل یہ خواہش ظاہر کی جارہی تھی کہ ویوز کے مختلف پیمانوں کی وجہ سے پیدا ہونے والی الجھن ختم کی جائے اور انہیں اپنی ویڈیوز کی حقیقی رسائی اور نمائش کا زیادہ واضح اندازہ مل سکے۔
نئے نظام کے نتیجے میں ویڈیوز پر ویوز پہلے کے مقابلے میں زیادہ تیزی سے ظاہر ہونے کا امکان ہے، کیونکہ ویڈیو شروع ہوتے ہی ویو شمار ہوجائے گا۔
