عراقی حکومت نے اعلان کیا ہے کہ امریکی فوج 30 ستمبر تک عراقی کردستان سے مکمل انخلا کرے گی۔
عراقی حکومت کے مطابق کردستان سے امریکی فوجی سازوسامان اور اہلکاروں کی منتقلی جاری ہے۔ کردستان میں امریکی فوجی اڈے عراقی سکیورٹی فورسز کے حوالے کیے جائیں گے۔
غیر ملکی میڈیا کے مطابق امریکی اور عراقی حکام کے درمیان انخلا کے طریقۂ کار اور فوجی سازوسامان کی منتقلی سے متعلق رابطے جاری ہیں۔
امریکی فورسز نے اربیل کے علاقے میں موجود فوجی سازوسامان اور فضائی دفاعی نظام کی منتقلی شروع کر دی ہے، بعض اہلکاروں اور دیگر عسکری وسائل کو بھی مرحلہ وار منتقل کیا جا رہا ہے۔
عراقی حکام کا کہنا ہے کہ یہ پیشرفت امریکا اور عراق کے درمیان ستمبر 2024 میں طے پانے والے مرحلہ وار سکیورٹی منتقلی کے منصوبے کا حصہ ہے۔
عراقی حکومت کا کہنا ہے کہ امریکی اور دیگر اتحادی ممالک کے ساتھ تعاون مکمل طور پر ختم نہیں ہوگا بلکہ فضائی دفاع، انٹیلی جنس اور انسداد دہشت گردی سمیت مختلف شعبوں میں دوطرفہ سکیورٹی تعاون جاری رہے گا۔
