نیویارک شہر کے میئر زہران ممدانی نے اسرائیلی وزیراعظم بنیامین نیتن یاہو کو گرفتار کرنے کے اپنے سابقہ وعدے سے پیچھے ہٹتے ہوئے کہا ہے کہ شہر کی انتظامیہ کے پاس بین الاقوامی فوجداری عدالت (آئی سی سی) کے وارنٹ پر عملدرآمد کا قانونی اختیار موجود نہیں۔
امریکا کے شہر نیویارک کے میئر زہران ممدانی نے اسرائیلی وزیراعظم بنیامین نیتن یاہو کی ممکنہ گرفتاری سے متعلق اپنے مؤقف میں اہم تبدیلی کرتے ہوئے کہا ہے کہ نیویارک سٹی انتظامیہ کے پاس ایسا کوئی قانونی اختیار موجود نہیں جس کے تحت آئی سی سی کے جاری کردہ وارنٹ پر عمل کیا جا سکے۔
زہران ممدانی نے سوشل میڈیا پر جاری ایک ویڈیو پیغام میں کہا کہ ان کی انتظامیہ نے تمام متعلقہ قوانین کا تفصیلی جائزہ لیا تاکہ یہ معلوم کیا جا سکے کہ اگر بنیامین نیتن یاہو نیویارک آئیں تو کیا شہر کی انتظامیہ بین الاقوامی فوجداری عدالت کے گرفتاری وارنٹ پر عمل درآمد کر سکتی ہے یا نہیں۔
انہوں نے کہا کہ قانونی جائزے کے بعد یہ بات واضح ہوگئی ہے کہ نیویارک سٹی کو آزادانہ طور پر اس وارنٹ پر عملدرآمد کا اختیار حاصل نہیں، اس لیے شہر کی پولیس نیتن یاہو کو گرفتار نہیں کرسکتی۔ تاہم انہوں نے یہ بھی کہا کہ نیتن یاہو کو نیویارک میں خوش آمدید نہیں کہیں گے، جہاں ان کی ستمبر میں اقوام متحدہ کی جنرل اسمبلی کے اجلاس میں شرکت متوقع ہے۔
