معروف یوٹیوبررجب بٹ اور ٹک ٹاکر ندیم نانی والا نے اپنے خلاف عائد کی گئی بیرونِ ملک سفر کی پابندی کو چیلنج کرتے ہوئے اسلام آباد ہائی کورٹ میں درخواستیں دائر کر دی ہیں۔
ذرائع کے مطابق رجب بٹ اور ندیم نانی والا سوشل میڈیا شخصیات نے عدالت میں الگ الگ آئینی درخواستیں جمع کروائی ہیں، جن میں مؤقف اختیار کیا گیا ہے کہ ان کے نام سائبر کرائم سمیت مختلف مقدمات میں شامل کیے گئے ہیں، جس کے نتیجے میں متعلقہ حکام نے انہیں بیرونِ ملک سفر سے روک دیا۔
درخواستوں میں کہا گیا ہے کہ بغیر کسی حتمی عدالتی فیصلے کے سفری پابندی عائد کرنا نہ صرف آئینِ پاکستان میں دیے گئے بنیادی حقوق کی خلاف ورزی ہے بلکہ اس سے ان کی پیشہ ورانہ سرگرمیاں بھی شدید متاثر ہو رہی ہیں۔ درخواست گزاروں کا مؤقف ہے کہ وہ سوشل میڈیا سے وابستہ پیشہ ور افراد ہیں اور بیرونِ ملک سفر ان کے کام کا اہم حصہ ہے۔
عدالت سے استدعا کی گئی ہے کہ درخواست گزاروں پر عائد سفری پابندی فوری طور پر ختم کی جائے اور متعلقہ اداروں کو ہدایت دی جائے کہ ان کے نام ایگزٹ کنٹرول لسٹ یا دیگر سفری پابندی کی فہرستوں سے نکالے جائیں۔
